बर्दघाट नगरपालिकाको वडा नं २ मा पर्ने पोखरीडाँडामा गएको मंगलवार जंगलमा लागेको डढेलो घरमा आउँदा पाँच घर परिवारको घरगोठ जलेर नष्ट भएको थियो । मानवीय क्षति नभएता पनि आवास र खाद्यान्नका कारण ती परिवारहरु बिचल्लीमा परेका थिए ।
सो वडाका वडाध्यक्ष दया दर्लामीको संयोजनमा दिव्यज्योति नमूना मावि,चिसापानी सामुदायिक वन उपभोक्ता समूह,सूर्यज्योति युवा क्लव,नमूना कृषक समूह,शान्ति ज्योति टोल विकास संस्था,धनप्रसाद श्रेष्ठ, दाउने डेकोर रबीन्द्र, मनोज कालिराज,बुटवल र दीपक ज्ञवालीले आर्थिक सहयोग गरेका छन् ।
ती सहयोगी संस्था र व्यक्तिहरुले पीडित सम्शेर सारु,नरबहादुर सिंजाली,गनबहादुर राना,बीरबहादुर सुनारी र बेतबहादुर तमाङलाई चामल,दाल,आलु,नून, तेल,सोयाबिन, साबुन,सर्फ लगायतका सामग्रीहरु सहयोग गरेको वडाध्यक्ष दर्लामीले बताइन् ।
थप सहयोगका लागि बर्दघाट नगरपालिका,नेपाल रेडक्रस सोसाइटी लगायत सामाजिक संघसंस्थाहरुसँग अपील गरिएको उनले जानकारी दिएकी छन् ।